Iloilo City–Mahimo nga daku nga septic tank ang gina-obra nga detention tank sa Jalandoni Street, city proper.

Suno kay Civil Engr. Nilo Jardeleza, ginhimo ang detention tank para kuntani sa tubig ulan nga ibuslog sa suba kun maghunas. Magabulig kuntani ini sa problema sa danaw sa siyudad pero wala na-antisipar nga manubo ang outfall sang sa tubig sa Iloilo River kag sa Iloilo Strait.

Magluwas dire, wala man naga-alalangut ang mga drainage pipes kabangdanan magasalalakot ang tubig nga magatenir sa detention tank bangud imbes kuntani nga ulan lang, magasimpon man dire ang tubig halin sa pamalay, institusyon pareho sang eskwelahan kag mga opisina.

Magabaho suno sa iya ang tubig kun magtenir sa detention tank. Ini suno sa iya ang problema nga dapat una tutukan agud makaserbe sang iya katuyuan ang detention tank.

Base sa konsepto, ang detention tank ang maga-impound sang tubig ulan agud mahagan-hagan ang pagdanaw sa siyudad. May taklob sa outfall sini nga siraduhan kun taub ang tubig sa suba kag buksan kag ibuga ang tubig halin sa detention tank kun maghunas. Pero bangud manubo ang outfall, kinahanglan pa suno kay Jardeleza nga gamitan sang pump agud masag-a ang tubig antes ibuslog sa suba.

Dugang nga kagastuhanan sa gobyerno suno sa iya ang pagtinlo sa detention tank bangud magatenir dire ang tubig.

Nagapati si Jardeleza nga wala natun-an sang maayo ang pag-obra sang detention tank, kulang kag posible ginpadalian ang plano sa amo nga proyekto.

May remedyo naman nga ginpreparar ang DPWH para masag-a ang tubig sa detention tank. May kontrata para sa pumping station nga amo ang maga-suction sang tubig kag ibuga ini sa suba.

Ginpa-athag ni Engr. Mavie Gustilo sang DPWH 6 nga magluwas sa Sargasso Construction nga amo ang nagaobra sang detention tank, may gin-award man nga kontrata sa F. Gurrea Construction para sa pag-pump sang tubig.

Supplier sang pump ang Ibarra halin sa Japan. May gates suno kay Gustilo nga awtomatiko nga magasira ukon mabukas depende sa kataason sang tubig sa suba. Gamitan sang pump ang tubig sa detention tank agud masiguro nga indi mapuno kag mag-awas.

May generator set nga gamiton sa pumping station kag ang gina-istoryahan na lang subong suno kay Gustilo amo ang magadumala sini.

Gin-isyuhan na sang DPWH sang notice of termination ang Sargasso Construction bangud sang delay nga proyekto. (AGB)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply