Lalaki Nga Naga-Inom Sa Railway, Lapaz, Gintiro-Patay; Mga Suspect Nagapalagyo
Lapaz, Iloilo City — Patay si Zaldy Concing, 55 anyos sang Brgy. Railway matapos gintiro pasado alas-8 kagab-i.
Gin-confirmar ni SPO1 Venus Gabawa sang Lapaz Police Station nga gindeklarar sang doktor sa Iloilo Mission Hospital nga napatay si Consing alas-9:40 sang gab-i bangud sang apat ka pilas sa dughan.
Base sa imbestigasyon sang pulis, naga-inom sa guwa sang iya boarding house si Consing upod si alyas Kano sang nakabati ang mga pumuluyo sang sunod-sunod nga lupok sang pusil. Anum ka empty shells sang wala pa nahibaluan nga pusil ang narecover sa crime scene. Suno sa mga residente, nagasakay sa motorsiklo ang duha ka suspek.
Wala pa sang anggulo nga ginasunod ang Lapaz police bangud padayon ang imbestigasyon. Apang sa ila pagpamangkot sa mga residente, mabuot kag maalwan ang ila pagkilala sa biktima.
Gin-confirm naman sang bayaw ni Consing nga tokhang surrenderer ang biktima kag nakatapos na sa community rehab.
Nagatrabaho sa luwas sang pungsod ang asawa ni Consing samtang may ara sila duha ka kabataan.
(att)