Bakhaw, Mandurriao Punong Barangay Remia Prevendido-Gregori kag yaya sang iya apo, ginluthang patay sa San Joaquin; Bana ni Gregori, pilason man
San Joaquin, Iloilo – Ginkumpirmar ni Police Senior Inspector Asencion Ortizo, hepe sang San Joaquin Police Station nga gintiro-patay sanday Bakhaw, Mandurriao Punong Barangay Remia Prevendido- Gregori kag ang yaya sang iya apo sa ila beach resort sa Brgy. Igcadlum kahapon sang hapon.
Gindala pa sa San Joaquin Mother and Child Hospital si Gregori, 59-anyos, apang gindeklarar nga dead on arrival.
Nagresponder naman ang Scene of the Crime Operatives sa bangkay ni Analee Antipatia, 45-anyos sang Negros Occidental, nga nahamtang pa sa crime scene.
May pilas sa dughan sanday Gregori kag Antipatia suno sa pulis.
Gindala man sa ospital ang bana sang punong barangay nga si Bonifacio nga may pilas sa ti-il.
Sa imbestigasyon sang mga pulis, naga-excursion ang pamilya Gregori upod sa ila mga himata sa Crystal Beach Resort sang hinali lang nagsulod ang ginabanta 10 ka armado nga wala makilal-an nga mga lalaki kag nagpangtiro.
Ginkumpirmar man ni Iloilo Police Provincial Office Director Marlon Tayaba ang amo nga impormasyon.
Suno kay Tayaba, nagluntad ang insidente alas 4:20 kahapon sang hapon.
Suno naman kay Igcadlum, San Joaquin Punong Barangay Rosalina Uy, nagkadto na sa beach resort ang SOCO.
Si Gregori ang utod ni the late PDEA-identified drug group leader Richard Prevendido. (JoMaque)