San Joaquin, Iloilo–Blangko pa ang San Joaquin police sa identity sang mga suspetsado nga nagtiro patay kay Bakhaw, Mandurriao Punong Barangay Remia Prevendido-Gregori kag sa yaya sang iya apo sa ila beach resort sa Barangay Igcadlum, San Joaquin kahapon.

Suno kay PSI Ascencion Ortizo, hepe sang San Joaquin MPS, ginatipon na nila ang mga ebidensya kag natalana nga kuhaan sang affidavit ang pamilya sang punong barangay agud mahibaluan ang posible motibo kag identity sang mga suspetsado.

Sa imbestigasyon sang police, isa lang ka tawo ang nagsulod sa cottage nga gina-okupar ni Prevendido-Gregori bangud mga empty shells lang sang .45 kalibre nga pusil ang narecover. Narecover malapit sa karsada ang anum ka empty shells sang .9mm pistol kag wala sang may narecover nga baseyo sang m16 rifle.

Nagapati si Ortizo nga target gid nga patyon si Prevendido-Gregori bangud ginpahayag sang kabulig nga ang punong barangay ang ginpangita sang nagsulod ang mga suspetsado.

Natay man ang yaya sang apo ni Prevendido-Gregori nga si Analee Antipatia sang Negros Occidental samtang napilasan sa tiil ang bana sang kapitan nga si Bonifacio.

‘Autopsy result’

Samtang natapos na ang pag-autopsy sa bangkay nanday Prevendido-Gregori kag Antipatia.

Suno kay Dr. Owen Libaquin, medico legal officer sang PRO 6, may lima ka igo sa lawas si Prevendido-Gregori, isa sa tuo nga butkon kag apat sa tuo nga parte sang dughan, tatlo diri ang naglapos sa iya wala nga kilid. May nakuha man nga slug sang ginapatihan 45 caliber pistol sa lawas sang punong barangay. Isa ang igo ni Antipatia sa wala nga parte sang likod nga naglapos sa iya tuo nga suso nga ginapatihan igo sang 45 caliber pisto. (AGB)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply