(UPDATE) MIWD, nakadihon na sang komento sa pag-appoint ni Mayor Joe Espinosa sang bag-o nga board of directors sang water district

Iloilo City–Natapos na sang legal counsel sang Metro Iloilo Water District ang igasumiter nga komento sa Local Water Utilities Administration (LWUA) angut sa pag-appoint ni Mayor Joe Espinosa sang bag-o nga board of directors sang MIWD.

Suno kay Atty. Roy Villa, ginapreparar man niya ang criminal kag administrative complaint batuk kay Espinosa. Nagapati si Villa nga illegal ang pag-appoint sang alkalde sa bag-o nga board of directors bangud wala pa sang bakante sa MIWD.

Ginpanindugan ni Villa nga indi magamit ni Espinosa ang ruling sang Korte Suprema sa sitwasyon sang MIWD. Mas maayo suno sa iya nga nag-file na lang sang kaso ang alkalde agud maathagan sa desisyon sang Supreme Court.

Una na ginpahayag ni Mayor Espinosa nga santu sa desisyon sang Korte Suprema ang iya pag-appoint sang bag-o nga set sang board of directors sang MIWD bilang appointing authority. (AGB)