(UPDATE) PRO 6: Wala pa sang task group agud mag-imbestigar sa pagtiro kay PO1 Dorben Acap Jr sa Arevalo

Iloilo City–Wala pa sang instruction si Police Regional Office 6 Director PCSUPT John Bulalacao nga magtukod sang task group agud imbestigaran ang pagtiro kay PO1 Dorben Acap Jr sa Dulonan, Arevalo kahapon sang hapon.

Suno kay PRO 6 Spokesperson PSUPT Joem Malong, ginabilin sa Iloilo City Police Office ang pag-imbestigar sa natabu kag kon may kahilabtanan si PO2 Melvin Mocorro nga pilason man nga gindala sa ospital pila lang ka minutos matapos gindala sa ospital si Acap. Padayon nga ginabulong sa The Medical City si Acap nga may pilas sa wala nga butkon kag dughan samtang halin sa Western Visayas Medical Center, ginsaylo sa Iloilo Mission Hospital si Mocorro nga may pilas sa tuo nga parte sang dughan nga naglapos kag tiil.

Base sa personal data sheet ni Acap, nagsulod ini sa Philippine National Police sang 2007 kag una gin-assign sa Regional Public Safety Battalion. Na-assign man siya sa ICPO headquarters, Regional Anti-Illegal Drugs Special Operations Group, Arevalo Police Station, Iloilo Police Provincial Office headquarters kag Miag-ao Police Station antes ginsaylo sa Regional Personnel Holding and Accounting Unit sa idalum sang Regional Headquarters Support Group. Wala naman sang ideya si Malong sa background ni Mocorro magluwas lang nga assign ini sa ARMM.

Ginconfirmar ni Malong nga base sa ila holdings, yara sa drug watchlist sang ICPO si Acap bilang high value target level 2 drug personality kag gin-angut sa iya tiyo nga gin-identify sang PDEA nga drug personality nga si Boboy Acap nga nadakpan kag preso sa Iloilo District Jail. (AGB)