Iloilo City–Posible may suya ang 47-anyos nga negosyante nga suspetsado nga nagtiro sa pamilya Jalandoni sa Brgy. Magsaysay, Lapaz kagab-i nga ginkapatay sang 15 anyos nga bata nga lalaki.

Suno kay Senior Insepctor Val Ladublan sang Lapaz Police Station, ginsaysay ni alyas Bam, kaupod sa pag-inom-inom sang suspek nga si Teopisto Sebanta alyas Totong, nga magahod kun maglabay sa ila lugar ang mga kagrupo ni Jedidiah Jalandoni, 18-anyos, nga magulang sang napatay. Suno pa kay alyas Bam, ang kagrupo ni Jedidiah ang ginapasibanggan ni Sebanta nga nagkuha sang iya sling bag nga may kwarta sang Miyerkules.

Napatay si Jezreel nga manghod ni Jedidiah bangud sang igo sa ilong, tuo nga dulunggan, liog kag guya. Padayon nga ginabulong sa ospital ang ila iloy nga si Marites nga may pilas sa dughan, tuo nga siko, tuo nga butkon kag wala nga kamot.

Napilasan man sa dughan si Jedidiah apang nakaguwa na sa ospital.

Nagpalagyo ang suspetsado kasunod sang natabu. Kaso nga murder kag frustrated murder ang ipasaka sang pamilya sa suspek. (AGB)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply