Iloilo City–Gin-ako sang 30-anyos nga timbang nga ginhilu-an sini ang iya mga amo lakip na ang mga kabataan.

Ginpreso sa Jaro Police Station si alyas Lyn, tumandok sang Sara matapos ginreklamo sang iya amo.

Natukiban ang ginahimo sang timbang sang naglain ang pamatyag sang pamilya kag nagpa-check up sa doktor. Wala pa ginkomprontar sang pamilya si Lyn kag ginpanilagan anay ini. Kahapon nakita gid sang pamilya nga may ginbutang si Lyn sa tubig nga ila gina-inom kag didto na nila ini ginreklamo sa police.

Suno kay Lyn, ginabutang niya sa kape sang iya amo kag ama ang Racumin. Ginasimpon naman sini sa gatas sang mga bata ang hilo. May ginabutang man ini nga hilo sa purified water nga gina-inom sang pamilya.

Sa interview kay Lyn, ginpahayag sini nga sa galunan sang tubig nga ginbutangan niya sang hilo, dire man siya nagakuha sang tubig nga iya gina-inom. Gin-ako sini nga naglain man ang iya pamatyagan.

Dugang ni Lyn, ginpati niya lang ang sugo sang iya nobyo nga si alyas Jun-jun nga nagatuyo magpangawat sa pamilya. May nakuha na nga electric fan kag mga bayo sa pamilya nga gina-obrahan ni Lyn ang iya nobyo.

Si Jun-jun ang nagatrabaho bilang trisikad driver. Ginpahayag ni Lyn nga ginapahog siya sang nobyo nga patyon kun indi siya magtuman sa sugo sini.

Nanginwala naman si Jun-jun nga ginsugo niya ang timbang. Suno sa trisikad driver, ginasunlog-sunlog lang sila ni Lyn sang iban nag trisikad drivers pero indi niya ini nobya.

Dugang ni Jun-jun, daw may diperensya si Lyn kag nalipay kon sunlugon sila.

Desidido ang amo ni Lyn nga pasakaan ini sang kaso nga pito ka counts sang frustrated murder. (AGB)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply