21 KA Mahindra Enforcer Patrol nga ginhatag sang PRO 6 sang 2015, indi na mapuslan bangud guba
Iloilo City — Indi na mapuslan ang 21 ka Mahindra Enforcer Patrol nga ginhatag sang Police Regional Office 6 sa nagkalain-lain nga police stations sang 2015 bangud nga guba.
Base sa Technical Inspection Report, as of June 7, 2018, unserviceable ang mga Mahindra vehicles.
Ginbanta sa P1,040,475 ang balayran sa 21 ka guba nga Mahindra Enforcer Patrol.
Kabahin ang Region 6 sa nakabenepisyo sang P1.89 billion nga budget para sa pagbakal sang ginabanta 1,900 ka Mahindra Enforcer Patrols nga ‘unfit’ sandig sa inspection report sang Commission on Audit (COA).
Sa report sang COA, masami nagakaguba, pigado ang serbisyo kag limitado ang balaklan sang spare parts sang Mahindra vehicles.
Suno kay PRO 6 spokesperson Supt. Joem Malong, gina-asikaso na sang PRO 6 ang pagpa-in sang budget sa mga unserviceable nga Mahindra Enforcer Patrols agud nga mapakay-o kag mapuslan. (JoMaque)