Iloilo City —  Gin-athag ni GSIS-Iloilo Branch Manager Vilma Fuentes nga puwede pa magamit sang mga pensioners nga nakapa-revalidate ang ila magnetic stripe Unified Multi-purpose Identification (UMID) card.

Kasunod ini sang reklamo sang pila ka pensioners nga indi sila maka-withdraw sa ATM bisan pa nga indi suspended ang ila pension.

Suno kay Fuentes, kon nakapa-revalidate na ang pensioner apang wala nakapa-ilis sang card sa bangko, puwede pa sini magamit ang magnetic stripe card sa ATM.

Pero kon ang pensioner suno sa iya nga wala nakapa-revalidate kag wala nakapa-ilis sang card, temporaryo ini nga indi makabaton sang pension.

Sa pinakaulihi nga impormasyon nga nabaton sang GSIS halin sa Union Bank of the Philippines, ginbawi sini ang restriction sang magnetic stripe card.

Ginpahayag ni Fuentes nga natabuan nga nagdungan ang revalidation sang GSIS sa restriction sang magnetic stripe gani nagkaproblema.

Halin sa magnetic stripe, gina-ilisan sang bangko ang card nga may micro chip kag EuroPay, Mastercard and Visa ukon EMV compliant base sa mandu sang Bangko Sentral ng Pilipinas (BSP).

Pero ginpahanumdom ni Fuentes nga kinahanglan gihapon nga magpa-revalidate ang mga pensioners nga wala nakahingagaw sa deadline.

Nagapadayon suno sa iya ang pagproseso sang ila opisina sa mga pensioners nga late nga nagpa-revalidate agud ma-claim ang ila pension.

Magpa-revalidate lang suno kay Fuentes sa GSIS office ukon sa malapit nga GSIS Wireless Automated Processing System (G-WAPS) ilabe na sa mga naga-edad sang 79-anyos panubo nga makasarang pa.

Una na ginpahayag ni Fuentes nga maka-request sang home visit ang mga pensioners nga naga-edad sang 80 anyos pasaka. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply