Suspek sa pagpangholdap, nadakpan sa Leganes

Leganes — Nadakpan sang Leganes police ang suspek sa pagpangholdap sa probinsiya.

Suno kay Senior Inspector Dadjie Delima, hepe sang Leganes Police Station, nadakpan sa checkpoint sa Barangay Mauring Poblacion si Ricky Heberola, 37-anyos nga residente sang Arroyo Street, Sta. Barbara.

Si Heberola ang gintudlo nga naghold-up kay Harris Sombria, 35-anyos sang Jibao-an, Pavia kag Assistant personnel sales representative sang Japan Tobacco International sa Barangay Guinobatan, Leganes.

Narecover kay Heberola ang 45 caliber pistol, duha ka magazine, granada, suspected shabu, kag P2,500 nga collection ni Sombria.

Suspect man si Heberola sa serye sang robbery-hold-up sa Sta. Barbara, Leganes, Passi City kag Dumangas.

Nadakpan gilayon si Heberola sang nagtawag ang mga pahinante sang Japan Tobacco International nga iya ginhold-up sa Leganes police.

Ginpahayag nga ex-marines si Heberola. (JoMaque)