Bangrus nga ginpahayag nakuhaan sang shabu sa hasang, ginbutang sa refrigerator agud ipreserba bilang ebidensya sa korte
Pavia, Iloilo -Ginkunfirmar ni Chief Inspector Fernand Limbungan, hepe sang Pavia Police Station nga ginpreserve nila ang bangrus nga ginpahayag nakuhaan sang sachet sang suspected shabu sa hasang.
Ang isda nakuha kay anay Desamparados, Jaro Barangay Captain Noemi Jablo, sa buy-bust operation sang Hulyo 10 sang hapon sa Brgy. Ungka 2, Pavia Iloilo.
Ginbutang sa refrigerator ang bangrus nga isa sa mga ebidensya nga ipresentar sang police sa korte sa pagpasaka sang kaso.
Suno kay Senior Inspector Kennith Bermejo, chief sang Regional Drug Enforcement Unit ukon RDEU, magluwas sa bangrus, ginagamit man sang anay punong barangay ang iban nga mga isda kasubong sang bulaw sa pagbaligya sang illegal nga druga.
Arestado si Jablo kag iya kabulig nga si Alton Guirjen, 30 anyos sang Barangay Desamparados, Jaro.
Napasakaan na si Jablo sang kaso sa pagbaligya kag paghupot sang illegal nga druga kag paghupot sang drug paraphernalia. Conspiracy naman ang ginpasaka nga kaso batuk kay Guirjen. (JoMaque)