Tigbauan, Iloilo (UPDATE) – Duha sa apat ka anggulo nga ginpaguwa sang Police Station 1 ang ginhatagan sang bug-at sang pamilya sa pagtiro patay sa negosyante sang itlog sang pugo nga si Ranny Bibanco, 33 anyos sang Barangay 2, Tigbauan.

Suno kay Romari Bibanco, amay ang napatay, ginakonsiderar sini nga pinakamabug-at nga motibo ang love triangle matapos nabalahuba sa ila barangay nga may karelasyon ang iya bata nga asawa sang seaman.

Ginconfirmar ni Romari nga naka-istoryahanay sila sang iloy sang seaman tatlo ka tuig na ang nakaligad kag iya ginpa-athag nga wala niya ginatolerar kon matuod nga may relasyon si Ranny kay alyas She. Apang pareho man nga nagapanginwala ang duha nga may relasyon sila suno kay Romari.

Posible man nga motibo suno sa amay ang negosyo sang iya bata. Suno diri, nagdiretso na si Ranny sa pagdeliver sang itlog sang pugo sa mga customers nga nagakadto pa sang una sa Iloilo Terminal Market.

Patapuson lang sang amay ang lubong antes hikuton ang pagpangita sang hustisya sa iya bata.

Si Ranny ang gintiro samtang nagapungko sa guwa sang Iloilo Terminal Market kaina sang aga. Wala pa nakilala ang riding-in-tandem nga suspek. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply