Tricycle driver, gintiro patay sang riding-in-tandem sa Lapaz; involvement sa illegal nga druga kag kaso nga pagpangawat, ginasunod nga motibo sa krimen

Iloilo City–Lima pa lang ka bulan nga nakagguwa sa prisuhan ang tricycle driver nga gintiro-patay sang riding-in-tandem sa Valderrama Road, Lopez Jaena Sur, Lapaz pasado las-7 kaina sang aga.

Suno kay Baldoza, Lapaz anay kapitan Antonio Jaleco, may kaso nga theft si Ely Tipanan, 38-anyos, residente man sang Baldoza nga rason sang iya pagkapreso.

Ginhinambit sang anay kapitan nga may involvement man sa druga si Tipanan.

Suno kay Jaleco, nag-ako sadto si Tipanan nga nagagamit siya sang druga pero ginapanghiwala sini nga pusher siya. Wala ini nakasurrender sa Tokhang.

Nagapagguwa sa Villa Hermosa Subdivision ang biktima kag may apat pa ka pasahero nga sakay sang gintiro.

Suno sa testigo, nagabantay na sa kilid sang karsada ang duha ka naga-angkasanay sa motorsiklo nga lunsay nakasuksok sang itom nga jacket kag pareho nga naka-helmet. Pito ka lupok sang pusil ang nabatian sang testigo.

Base sa inisyal nga impormasyon, may igo sa ulo kag likod ang biktima. (AGB)