Grupo nga United People’s Consultation for SONA, mahiwat sang programa kadungan sang SONA ni Presidente Rodrigo Duterte

Iloilo City–Magahiwat sang programa ang grupo nga United People’s Consultation for SONA kadungan sang State of the Nation Address ni Presidente Rodrigo Duterte sa Hulyo 23.

Ang grupo, ginabug-usan sang nagkalain-lain nga sector kasubong sang transport group, youth, simbahan, kag madamo pa.

Sa ila sinapol kahapon, ginpabutyag ni Promotion of Church People’s Response ukon PCPR-Panay chairperson Very Rev. Marco Sulayao nga katuyuan sang grupo nga ipahibalo sa publiko ang matuod-tuod  nga sitwasyon sang pungsod halin sang nagpungko si Duterte pareho sang epekto sang TRAIN Law sa mga pigado; indi insakto nga pamaagi ni Duterte sa war on drugs nga nagresulta sang sunud-sunod nga kaso sang pagpamatay; mga kaso sang pagpang-harass sa mga pari, kag ang indi maayo nga pahayag sang presidente parte sa Diyos.

Tema sang programa ang “Kalayaan, Katarungan, Demokrasya; Hindi Duterte Cha-Cha, Hindi Diktatura”  nga nagapakita sang pagpamatok sang grupo sa pagdumala ni Dutere sa pungsod.

Hiwaton ang programa ala-1 hapon sa atubang sang Iloilo Provincial Capitol. (AGB)