Tokhang Kontra Armas Luthang (TKAL), ilunsar sa Western Visayas

Ilunsar sa Lunes, Hulyo 23, ang Tokhang Kontra Armas Luthang (TKAL) sang Police Regional Office 6.

Suno sa bag-o gindesignar nga spokesperson sang Iloilo Police Provincial Office, SPO2 Gregoria “Greg” Antonano, katuyuan sini nga mapahagan-hagan ang numero sang mga loose firearms nga mahimo maggamit sa kriminalidad ilabe na sang guns-for-hire kag riding-in-tandem.

Sakop sini ang mga pusil nga wala pa na-renew ang lisensiya. Pending sang application para sa renewal sang lisensiya, ang gun owner mahimo magpa-safekeeping sang ila pusil sa police station suno pa kay Antonano.

Sa probinsiya, ang mga hepe sang police stations sa kada banwa ang magapanguna sa TKAL.

Ang hepe ang magatukod sang Tokhang team nga magakadto sa mga pamalay pareho man sang ginhimo sa tokhang sa druga.

Himuon ang Tokhang operations halin las 8 sa aga tubtob las 5 sa hapon kag ang mga police dapat nakasuksok sang proper uniform.

Magapakig-angut ang mga ini sa mga barangay officials kag may upod nga human rights PNCO sa operation. (AGB)