HVT drug personality sang PDEA 6, dakup sa buy bust operation sa Tigbauan

Tigbauan, Iloilo — Nadakpan sa buy bust operation sa Barangay 5, Tigbauan ang high value target drug personality sa listahan sang Philippine Drug Enforcement Agency 6.

Suno kay PDEA 6 spokesperson David Garcia, nakuha sa subject nga si Jenny Lynn Lee, 28 anyos, kag live-in partner sini nga si Kim Alfred Traviña, 37 anyos, ang isa ka sachet sang suspected shabu kag buy bust money. Miembro sang Odicta Drug Group ang duha suno kay Garcia.

Base sa imbestigasyon sang PDEA, nagakuha sang drug supply si Lee sa syudad kag ginadul-ungan man kon kaisa sa Tigbauan.

Gin-ako naman ni Senior Inspector Hermogenes Eulatic, hepe sang Tigbauan Police Station, nga na-tokhang nila ang maglive-in partner apang nanginwala ang duha nga na-angut sila sa illegal drug trade. Ginatinguhaan pa sang Aksyon Radyo nga makuhaan sang komento ang maglive-in partner. (JoMaque)