Kaso nga rape, ipasaka sang Badiangan police batuk sa maestro nga ginreklamo nga naglugos sa 20-anyos nga estudyante

Badiangan, Iloilo — Pasakaan sang kaso nga rape ang maestro nga ginreklamo nga nag-rape sa 20-anyos nga college student. Suno kay Chief Inspector Dennis Pamunag, hepe ang Badiangan Police Station, ipasaka nila ang kaso buwas (Hulyo 30).

Sa pagpangusisa sang Badiangan police, may patimaan nga natandog ang tagreklamo. Natabu suno sa iya ang paghimulos sa estudyante sa sulod sang comfort room sa balay sang maestro.

Yara man sa balay ang bata sang maestro apang wala nakapangayo sang bulig ang tagreklamo bangud gintabunan ang iya baba kag bangud sang kahadlok.

Mag-abyanay ang pamilya sang estudyante kag masami man nga nagabulig ang estudyante sa mga ulubrahon sa eskuwelahan. (JoMaque)