Dumarao, Capiz — Arestado ang pari sa Dumarao, Capiz matapos ginpahayag nagpalupok sang pusil sa Brgy. Poblacion Ilaya las 11:30 kagab-i (Hulyo 28).

Base sa report sang Police Regional Office VI , nag-ugat ang insidente sang nakita sang pari nga ginkilala kay Federico Lim, 45-anyos sang Brgy. Bailan, Pontevedra, Capiz, nga naka-park sa atubang sang kumbento ang apat ka mga motorsiklo sang mga pamatan-on.

May ginahiwat nga aktibidad sa plaza gani sa atubang sang kumbento nag-park sang ila motorsiklo ang mga tagreklamo.

Suno kay Chief Inspector Juvy Cordero, hepe sang Dumarao Police Station, naakig ang pari kag ginpangtumba ang mga motorsiklo bangud indi makaagi ang salakyan sang iya mga bisita.

Ginkomprontar ang pari sang mga tagreklamo tubtub nga nagbaisay kag nagpalupok sang pusil ang ginreklamo.

Wala sang may nasamaran kasunod sang insidente.

Sa pagpamangkot sang Dumarao police sa pari, gin-ako niya nga nakapalupok siya sang pusil apang nagpasalba lang.

Gin-ako man sang pari nga nakainom siya kag ginpangtumba man niya ang mga naka-park nga motorsiklo sa tubang sang kumbento suno sa pulis.

Nagdesisyun ang mga tagreklamo nga indi na mag-file sang kaso pero mapasaka sang kaso ang Dumarao police bangud nga expired na ang lisensya sang pusil sang pari. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply