Bangkay sang babaye nga halos wasak ang nawong kag luslos ang pantalon kag underwear, nasapwan sa Jordan, Guimaras; biktima, wala pa nakilala

Guimaras–Luslos ang pang-idalum nga panapton sang bangkay sang babaye nga nasapwan sa kasi-utan sa Caram Street sa Alibhon, Jordan, Guimaras kaina sang aga.

Suno kay PO3 Mary Jane Song, head sang Women and Children’s Protection Desk sang Jordan Police Station, indi makilala ang nawong sang babaye nga ginabanta naga-edad sang 20 tubtob 25 anyos bangud halos wasak na ang ulo kag guya nga ginapatihan ginlampusan. Nabatak pasaka ang t-shirt sang babaye kag luslos naman ang iya pantalon kag underwear.

Nakita malapit sa bangkay ang panyo nga pink kag itom nga medyas nga wala sang pares. Halos indi makita ang bangkay kon maglabay lang sa banas bangud nagadistansya ini sang masobra isa ka kilometro halin sa highway.

May iloy nga nag-claim nga bata niya ang nasapwan nga bangkay pasado alas-8 kaina sang aga pero nagpahibalo man sang ulihi sa police nga na-contact sini ang iya anak. (AGB)