Pagdala sang pusil sa mga pari, wala ginatolerar sang Jaro Archdiocese

Iloilo City — Wala ginatolerar sang Archdiocese sang Jaro ang pagdala sang pusil sang mga pari. Reaksyon ini ni Father Angelo Colada, chairman sang Social Communications sang Archdiocese sang Jaro kasunod sang pagpalupok ni Father Federico Lim sang iya pusil sa Poblacion Ilaya, Dumarao Capiz sang Hulyo 28 sang gab-i.

Suno kay Colada, hugot gid nga ginadumilian sa simbahan ang pagdala sang pusil bangud indi ini nagakabagay sa mga pari. Indi magpasilabot ang simbahan sa kaso ni Lim suno kay Colada kag dapat sini nga atubangon ang iya kaso. Madumduman, natukiban nga expired na ang lisensya sang pusil ni Lim, 45 anyos sang Barangay Bailan, Pontevedra, Capiz.

Naakig si father lim sang nakita nga naga-obstruct sa atubang sang kumbento ang motorsiklo sang mga pamatan-on nga naglantaw sang aktibidad sa plaza.  Ginpangtumba sang pari ang mga motorsiklo bangud indi makaagi ang salakyan sang iya mga bisita.  Ginkomprontar ang pari tubtub nga nagbaisay kag nagpalupok sang pusil ang ginreklamo.  Sa pagpamangkot sang Dumarao police, gin-ako niya nga nakapalupok siya sang pusil apang nagpasalba lang. (JoMaque)