Igbaras, Iloilo–Ginkumpirmar ni Chief Inspector Rogelio Tumagtang, hepe sang Igbaras Municipal Police Station nga nagluntad ang landslide sa Barangay Igpigos nga nahamtang sa boundary na sang Igbaras kag Tubungan kahapon sang kaagahon, Agosto 4.

May impormasyon suno kay Tumagtang nga may duha ka sitio nga ginpahayag apektado sang landslide.

Mahimo lang maagyan sang motorsiklo ang karsada nga apektado sang landslide.

Ginkumpirmar man ni Tumagtang nga may impormasyon nga nakalab-ut sa ila nga indi magnubo sa 10 ka mga balay nga na-damaged sa pagkatiphag sang duta.

17 tubtob 20 ektaryas sang duta nga nagasakop sang Sitio Rumbang kag Sitio Cabaoy sa Barangay Igpigos, Igbaras ang apektado sang landslide.

Suno kay Theresa Toledo, manunudlo sa Igpigos, apektado sang pagkatiphag sang duta ang mga talamnan kag mga pamalay halin sa Igpigos nga nahamtang sa boundary na sang Igbaras kag Tubungan.

Ang landslide suno sa iya naglab-ut sa Barangay Navillan sa Tubungan.

Sa inisyal nga paglibot sang mga barangay officials, ginpahayag ni Kagawad Joey Estardo sang Igpigos nga indi magnubo sa 10 ka balay ang na-damaged lakip ang balay sang ila kapitan nga si John Noe Tacan.

Suno kay Estardo, nagluntad ang landslide halin dos tubtob las kuwatro sang kaagahon.

Nabatyagan suno sa iya sang mga residente nga nagahulag ang duta kabangdanan madasig man ang mga ini nga nagpalagyo.

Gin-athag naman ni Kagawad Estardo nga nakita na kag luwas ang residente nga una na ginreport missing kasunod sang landslide. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply