Iloilo City — Daku ang posibilidad nga ginpatay si Emilyn Ganancial, 23 anyos sang Sta. Teresa, Jordan, Guimaras, sa lugar sa diin siya nasapwan sang nagligad nga semana.

Suno kay Dr. Owen Lebaquin, kon basehan ang resulta sang pag-autopsy niya sa bangkay, wala sang mga gasgas sa paa kag tiil ni Ganancial nga patimaan nga ginguyod siya. Antes sini, ginhambal ni Felicidad Mallorca, iloy sang suspek nga ex-boyfriend ni Ganancial nga si Antonio Mallorca, 23 anyos sang Sibunag, nga base sa panugiron sang suspek, naluslos ang pantalon kag underwear sang biktima bangud ginguyod niya. Suno pa sa iloy, una ginlampusan sang bato sang biktima ang iya bata gani iya ginbalusan kag indi man matuod nga ginhimuslan ang dalaga.

Base sa autopsy result, napatay si Ganancial bangud sang madamo nga pilas sang pagkahampak sang bato sa iya ulo kag may patimaan man sang sexual abuse sa kinatawo sang biktima. May mga pilas man ini sa likod sang palad nga posible iya ginsagang samtang ginalampusan siya sa ulo.

Preso na si Mallorca sa Jordan Police Station apang nagbalibad na nga magpa-interview kag ginpahayag nga atubangon na lang sini ang kaso sa korte. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply