NBI 6, Iloilo City–Nagsurrender sa National  Bureau of Investigation ang 17-anyos nga lalaki nga nag-ako nga isa siya sa mga naka-upod sa pagpatay sa Indian national nga si Harvender Singh sa Barangay Lupa, Sta. Barbara sang Agosto 7 sang gab-i.

Suno kay Pen-Pen, may lima siya ka kaupod lakip ang isa ka babaye kag gintudlo nga nagsugo nga patyon si Singh si alyas Anghel. Ginpahayag ni Pen-Pen nga naga-inom sila sa balay sang iya abyan sa Pavia sang ginsugo ni Anghel nga patyon ang biktima agud nga wala na sang ‘hassle.’

Dugang ni Pen-Pen, wala man siya nakahibalo sang rason ngaa ipapatay ni Anghel si Singh. Ginhinambit pa sini nga may natabu kanday Singh kag Anghel antes ginpatay ang Indian national.

Sa inisyal nga pagpangusisa sang NBI, ginpahayag nga may relasyon sanday Singh kag alyas Anghel suno kay Special Agent John Katipunan.

Nasapwan ang bangkay ni Singh nga may pilas sang pagkabuno sa tangkugo kag gingulgol ang liog. (AGB)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply