Kaso nga robbery with homicide, ginpasaka na batuk sa mga suspetsado sa pagpatay sa Indian national sa Sta. Barbara

Iloilo City — Ginpasaka na ang kaso nga robbery with homicide batuk sa tatlo ka menor de edad nga lalaki kag kay Angel Simpas angut sa pagpatay kay Harvender Singh, ang Indian national nga nasapwan nga gingulgolan kag may pilas sang pagkabuno sa tangkugo sa Barangay Lupa, Sta. Barbara sang Agosto 7 sang gab-i.

Suno kay Senior Inspector Jose Rey Pabalan, hepe sang Sta. Barbara Police Station, may duha sila ka testigo — isa ka menor-de-edad kag isa ka 19 anyos nga ginpahayag kaupod sang mga suspek sa pag-inom apang wala nag-upod sa paghimo sang krimen.

Lain-lain naman ang version sang mga suspek kag bisan ang testigo sa natabu.

Sa version ni alyas Pen-Pen, 17 anyos nga nagsurrender sa NBI 6 sang Agosto 8, si Angel ang nagplano nga patyon si Singh bangud may kaakig siya sa biktima.

Ginpanghiwala ni Pen-Pen nga nakabuno siya kay Singh pero gin-ako nga nakatindak siya sa biktima. Nagsurrender kahapon, Agosto 10 ang mga abyan ni Pen-Pem nga sanday alyas Albert, 16 anyos kag alyas Calvin, 17 anyos.

Sa version ni Angel, indi niya kilala ang tatlo ka menor kag ang iya abyan amu si alyas Stephanie nga utod sang isa sa mga suspects. Ginpahayag ni Angel nga wala siya nakahibalo nga ginsundan sila sang tatlo ka suspek kag may tuyo ang mga ini nga holdapon kag patyon ang Indian national sang nagkitaay sila ni Singh.

Samtang ginpahayag ni alyas Orly, ang 19 anyos nga testigo nga nabatian niya si Angle nga naghambal nga patyon ang biktima para wala problema kag nakita man nga duha ang nagsakay sa motorsiklo ni Singh pakadto sa Cabugao Norte pero wala niya nakita kon sin-o bangud madulom. (JoMaque)