Mga pusil kag sachets sang suspected shabu, nakumpiskar sa raid sa Pavia; subject sang operasyon kag 2 pa, arestado

Pavia, Iloilo–Nagconduct sang search operation ang Pavia police sa pagpanguna ni PCI Fernand Limbungan sa balay ni Peter Paul Gregori, 27 anyos sang Zone 7 Barangay Ungka 2, mga las 8 kaina sang aga, Agosto 14, bitbit ang search warrant nga gin-isyu ni Hon. Judge Victor Gelveson sang RTC Branch 36.

Nakuha sa balay ni Gregori ang isa ka ka 38 caliber revolver, isa ka single shot home made nga pusil, 6 ka bala sang 38 cal revolver, 9 ka bala sang m16, 1 ka holster sang 38 nga pusil, 1 ka pouch nga itom, 1 ka itom nga driver’s license jacket, 1 ka jewelry box nga itom, 1 ka improvised toother, 4 ka disposable lighter, 350 pesos nga kwarta kag 25 ka sachets sang suspected shabu.

Sa follow-up operation sang Pavia police mga las 8:30 sang aga, nadakpan naman si Joan Lauresta, 36 anyos sang Tigum, Pavia. Siya ang gintudlo nga nakipag-transaction kay Gregori nga magbaligya sang pusil. Narecover kay Lauresta ang 45 kalibre nga pusil nga amo kontani ang ibaligya niya kay Gregori, empty magazine, 15 thousand pesos cash, celphone, yabi sang motor kag drivers’ license.

Na-aresto naman sa buy bust operation si Rolly Castor, 25 anyos sang Rizal Pala-pala, City Proper, mga ala 1:30 kaina sang hapon. Si Castor naman ang ginatudlo runner kag collector ni Gregori sa iya illegal drug transaction.

Wala nadakpan ang ginatudlo nga source sang illegal drugs. Posible suno kay PCI Limbungan nga nagamit sang code si Castor sa ila istoryahanay sang iya source gani wala nadakpan sa follow-up operation sang kapulisan.

Ginbuyagyag ni Limbungan nga ara sa ila drug watchlist si Gregori. (AGB)