Operation Sang Metro Express Modernized Jeepneys Sa Pavia Ginpa-untat Temporaryo

Iloilo — Ginpa-untat temporaryo sang tagdumalahan sang metro express ang biyahe sang ila Modernized Jeepneys Units sa Pavia matapos ang sinapol sa Sangguniang Bayan sang nagligad nga semana.

Ini ang ginpahibalo ni Pavia SB member Pete Trimañez, chairman sang Committee on Transportation kasunod sang reklamo sang mga transport associations sa banwa.

Suno kay Trimañez, gin-ako sang management sa ila sinapol nga wala ini nakahibalo nga kinahanglan may pahanugot sang LGU ang operation sang modernized jeepneys.

Ginpanindugan ni Trimañez nga wala sang natabu nga coordination kag konsultasyon gani nagwangal ang mga tricycle kag jeepney drivers.

Una na ginpabutyag ni LTFRB 6 Director Richard Osmeña nga kompleto sa dokumento ang metro express sang nag-apply agud makabiyahe halin sa mall sa oton pakadtu sa pila ka transport terminals.

Apang ang central office suno sa iya ang naghimo sang inspection, nag-hearing, nag-aprobar kag nagmandu sa LTFRB 6 nga maghatag sang provisional authority.

(ATT)