ICLAJODA president Raymundo ‘Boyet’ Parcon, nagpahunomdom sa mga drivers kag operators nga sa Agosto 30 pa ipatuman ang saka sa pletehan

Iloilo City–Ginpahanumdom ni Iloilo City Loop Alliance of Jeepney Owners and Drivers Association ukon ICLAJODA President Raymundo ‘Boyet’ Parcon ang mga jeepney operators kag drivers nga sa Agosto 30 pa maga-epekto ang saka sa pletehan.

Indi dapat suno sa iya magpanukot ang drivers sang dugang nga plete kon wala ini sang ipakita nga fare matrix. Php 5,000 ang multa sa driver kon madakpan nga nagapanukot sang bag-o nga plete nga wala sang taripa. Posible man suno kay Parcon nga makanselar ang prangkisa sang jeep kon may violations.

Una na ginpabutyag ni LTFRB 6 Chief Transportation Development Officer Janet Solinap nga dapat magkuha sang taripa agud malikawan ang problema.

Base sa fare matrix, Php 8.50 ang regular fare as una nga apat ka kilometro kag Php 6.80 sa mga estudyante, senior citizens kag persons with disabilities. (AGB)