Iloilo — Nagapati si Iloilo Police Provincial Office Director Marlon Tayaba nga indi balos sang New People’s Army ukon NPA ang pagpalupok sang improvised explosive device kag engkwentro sa Barangay Isian Victoria, Leon kahapon sang aga, Agosto 24.

Pahayag ini ni Tayaba kasunod sang insidente nga nagresulta sa pagkapilas sang tatlo ka pulis lakip ang platoon leader sang 1st Iloilo Provincial Mobile Force Company.

Suno kay Tayaba, kabahin lang sang combat operation sang NPA ang natabu kag indi bangud sa pagkapatay sang ila pito ka miembro sa engkwentro sa San Jose, Antique sang nagligad nga semana.

Luwas sa katalagman sanday Chief Inspector Abner Jordan  nga may pilas sa tuo nga guya kag wala nga abaga, PO2 Rosenie Lebuna nga may pilas sa wala nga kamot kag abaga kag PO1 Mark  Ringo Fernando nga may pilas sa wala nga paa matapos naigo sang shrapnel sa naglupok nga IED. May pilason man sa mga rebelde suno kay Tayaba base sa pahayag sang mga residente nga may ginatuwangan ang mga nagpalagyo.

Gina-imbestigaran pa kon ano nga unit sang NPA ang naka-engkwentro sang mga pulis. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply