Iloilo City–Lima ka sachets sang suspected shabu nga ginabanta may street value nga masobra Php100,000 ang nakita sa balay sang subject sang search warrant sang Philippine Drug Enforcement Agency 6 sa San Isidro, Jaro kaina sang aga.

Apang nanginwala si Ryan ‘Arsap’ Jablo nga siya ang nagapanag-iya sang items. Ginpanindugan man sang iloy sini nga si Nenita nga matinlo ang iya bata.

Gin-ako ni San Isidro PB Felix Dureza nga nagsurrender sa Oplan Tokhang si Arsap sang 2016.

Background ni Arsap

Si Arsap ang utod sang napatay nga drug personality nga si Rusty Jablo nga bana ni anay Desamparados, Jaro Punong Barangay Noemi Jablo. Si Rusty ang gin-angut sang mga otoridad kay the late PDEA identified drug group leader Richard Prevendido kag nangdulaan sa syudad sang nagdaug si Presidente Rodrigo Duterte sang 2016.

Nobyembre 2016 sang nabalitaan nga nagpanghostage si Rusty sang anum ka bulan nga lapsag sa General Santos City gani ginpreso kag Nobyembre 22 sa amo man nga tuig, nagbitay ini sa CR sang Police Station 4 sa GenSan. Sa pagpati sang asawa, nagsuprer sang nerbyos ang iya bana gani nagsuicide.

Nagpanginmatay si Rusty isa ka bulan matapos nga gintiro-patay ang iya manghod nga si Carcar Jablo sa Desamparados kag ginapatihan sang mga pulis nga angut sa illegal drugs ang krimen.

Hulyo, 2017 naman sang gindakup sa buy bust operation ang isa pa gid ka utod sang mga Jablo nga si Carla Jablo-Ledesma upod sa iya bana nga si Arnel Ledesma sa Tanpael, Tigbauan.

Samtang sang Hulyo 10 subong nga tuig, nadakpan sa buy bust operation sang Regional Drug Enforcement Unit sa buy bust operation sa Ungka Dos, Pavia ang asawa ni Rusty nga si anay Punong Barangay Noemi Jablo. (AGB)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply