Concepcion, Iloilo–Nadakpan sa akto sang Concepcion Police nga nagapangmina ang tatlo ka lalaki sa Barangay Aglosong kahapon sang hapon.

Arestado sanday Robert Cabrillos, 55 anyos kag Joel Labitao lunsay sang Manipulon, Estancia, kag Jomarie Baldoza, 42 anyos sang Siempreviva, San Dionisio.

Suno kay PO2 Patrick Retirado, imbestigador sang Concepcion Police Station, may nabaton sila nga impormasyon nga may armado nga mga lalaki nga ginpahayag illegal nga nagamina sa lugar.  Gilayon nga nagpadulong sa lugar ang Concepcion Police sa diin ila naaktohan ang tatlo ka lalaki nga nagapangmina.

Dugang pa ni PO2 Retirado, may report man sila nga nabaton nga nagapamahog ang grupo sa mga pumuluyo sang lugar.

Duha na ka bulan suno sa iya nga naga-operate ang grupo kag ini ang pinakauna nga kahigayunan nga may nagpangmina sa lugar.

Nakuha sa mga lalaki ang homemade 5.56 revolver nga may tatlo ka bala kag 12 gauge shot gun nga may apat ka bala.

Preso sa Concepcion Police Station ang mga nadakpan kag posible nga magpangatubang sang kaso nga illegal possesion of firearms kag paglapas sa Philippine Mining Act. (AGB)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply