Maasin, Iloilo–Nagsurrender sa police ang stepfather nga nagtiro patay sa iya manak sa Barangay Buntalan, Maasin kagab-i, Agosto 30.

Ginconfirmar ni Inspector Oswald Gatuslao, hepe sang Maasin Police Station, nga nagpakig-angut sa ila ang Dumarao police kag ginpahibalo nga nagsurrender si Jerold Guillermo, 38 anyos sang Belison, Antique. Ginsugat sini si Guillermo sa Dumarao kag nag-abot ang mga ini sa Maasin Police Station alas-5 kaina sang hapon.

Suno kay Gatuslao, wala pa ini naka-istorya kay Guillermo gani wala pa natumod kon ano gid ang rason kon ngaa gintiro sini si alyas Faye, 16 anyos.

Sa pahayag ni Joy, 48-anyos nga iloy ni Faye, antes natabu ang pagtiro sa iya anak, may natabu nga pagbaisay sa tunga sang biktima kag suspect. Nag-ugat ang baisay sang suspek kag biktima sa cellphone bangud ginbutangan ini sang password ni Faye. Nagkuha suno sa iya sang pusil si Guillermo kag gintayaan ang biktima apang nawakli ini ni Joy. Ginpapalagyo ni Joy si Faye apang naabtan ini sang suspect kag gintiro.

May pilas sa ulo, dughan kag wala nga kamot ang biktima nga dead on arrival sang gindala ospital.

Si Guillermo ang 10 ka tuig na nga ka-live-in sang iloy sang biktima. (AGB)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply