Daw ginsulay ako ka yawa–stepfather nga nagpatay sa iya manak sa Maasin

Maasin, Iloilo–Wala napunggan ni Jerold Guillermo, 38-anyos nga stepfather nga magtulo ang luha samtang nagasaysay sa Aksyon Radyo Iloilo kun ano gid ang natabu sang adlaw nga gintiro niya kag ginpatay ang iya manak nga si Faye, 16-anyos sang Agosto 30.

Gin-ako ni Guillermo nga may dala siya nga pusil sang Agosto 30 sang nagkadto siya sa unibersidad sa siyudad sa diin naga-eskwela si Faye. Gindala niya ang pusil agud ipahog sa tomboy nga suno sa iya karelasyon ni Faye.

Ang pusil ginprenda kay Guillermo sang nagatrabaho pa siya sadto bilang kolektor sang Life Bank. Isa ka tuig na nga nagresign sa trabaho si Guillermo sang gintuyo siya i-assign sa Mindanao.

Pag-abot sa ila balay sa Buntalan, Maasin, nagabaisay ang duha. Nagpalangdulom ang panulok ni Guillermo sang ginpulihan siya ni Faye kag sang iloy sini nga si Joy, 48-anyos. 12 ka tuig na nga naga-live si Guillermo kag Joy.

Suno kay Guillermo, wala gid siya sang intensyon nga patyon si Faye. Kuntani suno sa iya wala lang gintuyo ni Joy nga agawon ang pusil.

Sa interview sang Aksyon Radyo, ginpahayag ni Guillermo nga “Indi ko hungod magbunot ka pusil. Ginsulay ako ka yawa. Wala ko sang plano nga patyon ang bata.”

Gin-ako sini nga nagabaisay sila ni Faye kun makita niya nga naga-chat ini sa tomboy kun nasobra ka gamit sang cellphone.

Ginbuyagyag man ni Guillermo nga mahilig makig-relasyon sa tomboy si Faye. Sa pagkamatuod suno sa iya, ika-apat na nga tomboy ang karelasyon sini subong. Dugang niya, may kaso siya sa Maasin nga ginpasaka sang tomboy nga iya man ginpahog.

Gin-athag ni Guilermo nga wala siya naga-druga.

Sa suspetsa naman nga may luyag siya sa iya manak, ginpahayag ni Guillermo nga “nasobrahan ang iya pagpalangga sa bata.”

Suno sa iya, nagapangimon siya pero wala siya “nakamiter” kay Faye.

Ginpahayag ni Guillermo nga sobra lang pagpalangga niya sa iya manak.

May mga tion suno sa iya nga gina-comfort niya ang dalaga paagi sa pagkupo ukon nagahulid sila pero wala ini suno sa iya sang malisya.

Dugang niya “naga-intiendihanay sila ni Faye, gusto niya, gusto man ni Faye pero ginapunggan lang nila.”

Pero malaw-ay suno sa iya sang term nga “may pagnanasa” ukon “ginamanyakan” niya ang dalagita.

Sobra lang sila ka-close nga duha kag may tiun man nga gina-tentar siya pero nagapanindugan gid ini nga wala niya natandog ang biktima.

Si Guillermo ang ginpasakaan na sang kaso nga murder may kaangtanan sa Child Abuse Law bangud sa pagpatay sa iya manak.

Ginapanindugan ni Guillermo nga aksidente lang ang pagtiro-patay niya sa biktima.

Sa autopsy sa bangkay ni Faye, ginpahayag nga wala sang patimaan nga nakapakighilawas ang biktima pero indi na intact ang hymen sini. (JoMaque)