ICLAJODA, nagpaandam nga ma-untat biyahe kun bawion ukon buhinan sang LTFRB ang gin-aprobahan nga P2 nga fare increase

Iloilo City — Nagpaandam ang Iloilo City Loop Alliance of Jeepney Owners and Drivers Association (ICLAJODA) nga ma-untat biyahe kon i-recall sang Land Transportation Franchising and Regulatory Board (LTFRB) ang gin-aprobahan nga P2 nga fare increase para sa mga depasahero nga jeep sa syudad.

Ini ang ginpabutyag ni ICLAJODA President Raymondo ‘Boyet’ Parcon bangud sang indi pag-intiendihanay sang mga mataas nga opisyal sang ahensya.

Suno kay Parcon, legal ang fare increase bangud ginsunod nila ang proseso antes gin-aprobahan ang ila petition.

Ginpahayag sini nga kon may problema si LTFRB  Board Member Atty. Ailene Lizada kag LTFRB Chairman Atty. Martin Delgra III, dapat nga ila solusyunan nga indi maperwisyo ang mga driver kag pasahero.

Una na ginpahayag ni Parcon nga mapasaka sang kaso sa Ombudsman si Lizada bangud wala ini nakadesisyun nga P2 pesos ang dapat nga fare increase. Ginrason sini nga 50 sentimos lang dapat nga increase para sa transport groups sa Iloilo. (JoMaque)