San Joaquin, Iloilo–Ginpulihan sang iya mga manghod ang magulang nga ginpahayag masabad kag nagapanghangkat inaway kun maka-inom.

Ang biktima nga nakilala kay Jose John Sandilantan, 44-anyos sang Barangay Taslan, ginpulihan labu, buno kag ginlampusan pa sang iya mga manghod nga sanday Victor, 43-anyos kag Dalmacio, 25-anyos pasado las nuebe kagab-i, Setyembre 5, 2018.

Nakaagum ini sang pilas sang pagkalabu sa puwak, wala nga parte sang dughan, tuo nga kamot, sag-ang kag likod.

May pilas man ini sang pagkabuno sa tuo nga portion sang iya dughan.

Sa inisyal nga imbestigasyon sang San Joaquin MPS, ginpahayag ni SPO1 Steve Francisc Facto nga nagpanghangkat sang inaway ang magulang samtang nagabitbit ini sang binangon kag kutsilyo.

Natabuan man nga naka-inom ang iya mga manghod rason nga ginsulong man nila ang balay sang magulang.

Ginpahayag napuno na ang mga manghod sa masami nga pagmaoy sang ila magulang kabangdanan ila gingubat ang balay sini sang nagpanghangkat ini sang inaway,

Una nga ginlampusan ni Dalmacio sang kahoy si Jose John. Naagaw man ni Victor ang kutsilyo kag binangon sa magulang kag ini ang gingamit sa pagbuno kag paglabu sa biktima resulta sang iya kamatayon.

Lunsay preso ang mga suspetsado nga manghod. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply