Hardinero, naghikog sa Maasin

Maasin, Iloilo — Patay ang hardinero nga naghikog paagi sa pagbitay sa iya kaugalingon sa sulod sang gina-istaran nga kamalig sa Brgy. Delcar kahapon, Setyembre 9.

Gindala pa sa Ramon Tabiana Memorial District Hospital si alyas Bryan apang gindeklarar nga napatay sang doktor.

Suno kay Kapitan Lesanne Grace Cartajena, pangayaw lang sa ila lugar ang naghikog gna nagapang-edaron sang 20-anyos kag tinuig na nga nagatrabaho bilang hardinero sang isa ka pamilya sa ila barangay.

Suno pa sa kapitan, ulihi nga nakit-an si Bryan nga naga-inom inom upod sang iya abyan. Luyag naman sang pamilya nga ipa-autopsy ang bangkay agud madula ang pagduda sa kamatayon sang lalaki. (JoMaque)