(UPDATE) Barangay kagawad nga una ginreport nga ginhostage sang NPA sa Janiuay, nanginwala nga sympathizer siya sang rebelde nga grupo; nanginwala man nga ginhimo sila nga human shield

Janiuay, Iloilo—Ginpanginwala ni Barangay Kagawad Romulo Lentija nga sympathizer ukon supporter siya sang New People’s Army (NPA).

Pag-athag ini ni Lentija matapos ang engkwentro nga Barangay Agcarope sa diin patay ang isa ka CAFGU member kahapon, Setyembre 9.

Suno kay Lentija, wala siya nagasuporta sa mga rebelde bangud nagatrabaho siya sa gobyerno.

Gin-ako sini nga may mga reports nga nagalabay ang armado nga grupo  sa ila lugar apang wala ginahukmungan sang NPA ang ila barangay.

Una na gin-athag ni Lentija nga indi man matuod nga ginhostage sila sang NPA fighters kag ginhimo nga human shield sang nagka-engkwentro sang mga soldado.

16 ka barangay sa Janiuay ginsuspender ang klase subong nga adlaw, Setyembre 10, matapos ang engkwentro. Suno kay Mayor Jojo De Paula, para sa kaluwasan sang mga estudyante, manunudlo kag residente ang pagsuspender sang klase bangud luyag nila ma-clear sang Philippine Army ang gintumod nga mga lugar. (AGB/NG)