PRESS RELEASE

CAMP PERALTA, Jamindan, Capiz – Ginkilala sang 3rd Infantry (Spearhead) Division sa idalum sang pagpamuno ni Major General Dinoh Dolina ang kaisog kag kabaganihan sang CAFGU Active Auxiliary (CAA) nga napatay sa engkwentro sa tunga sang tropa sang 61st Infantry Battalion kag mga terorista nga CPP-NPA sa Barangay Agcarope, Janiuay, Iloilo sang tinalikdan nga Dominggo, Setyembre 09, 2018.

Suno kay MGen Dolina, ginhalad ni CAA Virgilio Loraña ang iya kabuhi samtang nagapakig-away sa mga terorista nga CPP-NPA nga padayon nga nagapangilkil sang pagkaon kag kwarta bisan sa mga kubos nga pumuluyo sa lugar.

Ginpalab-ot man ni MGen Dolina ang iya kinasingkasingon nga pagbuylog sa kasubo sang pamilya ni CAA Loraña. Ginpahayag niya, bisan nagtaliwan sa kalibutan ang ila pinalangga sa kabuhi, ang kabaganihan nga iya ginpakita agud hilwayon ang katawhan sang Janiuay halin sa mapintas nga mga kamot sang mga terorista nga CPP-NPA ang pagadumdom tubtob sa katubtuban.

Ginpasalig sang 3ID ang pamilya ni Loraña nga may pagabatunon sila nga special financial assistance halin sa gobyerno.

Nahibaluan, may pagabatunon nga special financial assistance halin sa gobyerno ang pamilya sang mga CAA nga napatay samtang nagaperform sang ila trabaho ilabi na ang mga killed-in-action ukon KIA. Wala sang kasubong sini nga programa ukon benepisyo ang Terorista nga CPP-NPA para sa ila mga miyembro kag mga pinalangga sa kabuhi rason nga gina-engganyo gin naton sila nga sikwayon ang maduguon kag wala kapuslanan nga armado nga paghimakas kag magsugod sang bag-o kag produktibo nga kabuhi kaupod ang ila pamilya.

Si Loraña, 41 anyos kag residente sang Monte-Magapa, Janiuay, Iloilo, napatay bangud sang mga pilas tuga sang pagbuno kag tiro nga kahimuan sang mga terorista. May mga pilason man sa bahin sang terorista nga grupo suno sa mga tropa nga naka-engkwentro sa ila kag base sa mga tinulo sang dugo nga nakit-an sa encounter site. Nakarecover naman ang tropa sang militar sang mga matag-as nga kalibre sang armas sa ginluntaran sang engkwentro nga ginalakipan sang duha (2) ka M16 rifles, isa (1) ka AK47 rifle kag mga Improvised Explosive Devices (IEDs) nga ginbilin sang mga nagpinalagyo nga mga terorista.

Una dire, ginpahayag ni Colonel Benedict Arevalo, Commander sang 301st Infantry Brigade nga padayunon nila ang paglunsar sang offensive military operations batuk sa mga terorista nga CPP-NPA agud matapna ang ila pagpangilkil. Gin-engganyo man niya ang katawhan sa Panay nga padayunon ang pagkooperar sa pwersa sang gobyerno kag i-report ang hulag kag aktibidad sang mga terorista sa ila lugar pinaagi sa pagtawag ukon pag-text sa mga masunod nga numero: 0928-175-7208 and 0916-766-3740. ###

via 3rd ID, PA/Facebook

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply