(UPDATE) Mga nasunugan sa Boulevard kag West Habog-Habog sa Molo, nagakinahanglan sang gamit pangkusina kag bayo

Iloilo City–Gin-ako ni City Fire Marshal Chief Inspector Christopher Regencia nga nabudlayan sila sa pagsulod sa Boulevard kag West Habog-Habog, Molo bangud sang makitid nga dalan sa sunog kagab-i, Setyembre 10.

Isa sa mga ginhimo nga stratehiya sang mga bombero amu ang pagsugpon-sugpon sang 15 ka mga hose agud nga makasulod kag makalab-ot sa nasunugan.

Sa imbestigasyon sang Bureau of Fire Protection, short circuit ang ginapatihan ginhalinan sang kalayo.

Base sa record sang BFP, 34 ka mga balay ang nasunog sa duha ka barangay — 28 ang totally-damaged kag tatlo ang partially-damaged sa Boulevard samtang duha ang totally-damaged kag isa ang partially-damaged sa West Habog-Habog.

Ginabanta sa P1.2 million ang balor sang kahalitan sang sunog.

Nagahingyo naman si Boulevard Punong Barangay Virgilio ‘Kano’ Villanueva sang bulig para sa iya mga constituents nga nasunugan.

Lakip sa mga kinahanglan suno sa iya ang mga kitchen utensils, bayo kag iban pa nga kagamitan sa sulod sang balay. (AGB)