Iloilo City — Patay ang tricycle driver nga gintiro sang riding-in-tandem sa Zone 4 Ungka, Jaro kahapon sang hapon, Setyembre 11.

Ginkilala ang biktima kay Gerardo Mamarion alyas Togtog, 25 anyos, nga may mga pilas sa tuo nga parte sang iya lawas.

Suno kay Chief Inspector Tranquilino Querubin, hepe sang Jaro Police Station, base sa ila pagpangusisa, anum ang suspek ukon tagduha sa kada motorsiklo. Apang ang duha ka suspek lang nga sakay sa motorsiklo ang nagsunod kay Mamarion sa eskinita samtang papuli ini.

Ginpahayag naman ni alyas Vanessa, nagabaligya sa tiangge sa diin nagbakal pa ang biktima, nga nakasuksok sang bonnet ang duha ka suspek. Nabatian sini nga ginpamangkot sang duha ang pangalan ni Mamarion kag nagdumugay pa ang mga suspek kag biktima.

Dugang ni Vanessa, nangayo pa sang bulig si Mamarion apang wala sang nagpangisog bangud may pusil ang mga suspek.

Apat ka lupok ang nabatian ni Vanessa antes nakita si Mamarion nga nagahuray-ad samtang nalagyo ang mga suspek sa wala nahibaluan nga direksyon. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply