8 sachets sang suspected shabu, narecover sa drug buy bust operation sa Quintin Salas, Jaro
Iloilo City — 8 ka sachets sang suspected shabu ang narcover sa drug buy bust operation sang Regional Drug Enforcement Unit sa balay sang pamilya Soliva sa Quintin Salas, Jaro kagab-i, Setyembre 12.
Suno kay PSI Kennith Bermejo sang RDEU, naka-transaksyon sang ila asset paagi sa cellphone si Clint Soliva. Apang si Ryan Constantino, 39 anyos sang OƱate-De Leon, Mandurriao, nga ginpahayag runner ni Soliva ang nagpakigkita sa asset.
Ginpahayag ni Bermejo nga gindala ni Constantino ang asset sa balay sang mga Soliva bangud didto kuhaon ang items. Si Rosalie Gellanga, 27 anyos nga gintudlo ni Bermejo nga live-in partner ni Soliva, ang ginpahayag nga nagdahu sang walo ka sachets sang suspected shabu sa asset. Si Constantino naman ang nagkuha sang P5,200 nga buy bust money.
Gindakup man si Joely Develes, naga-arkila sa isa sa mga kuwarto sa balay sang mga Soliva, bangud may nakuha sa iya kuwarto nga mga pusil kag bala.
Magluwas sa 8 ka sachets sang suspected shabu nga ginabanta nagabalor sang P50,000, narecover man ang isa ka shotgun kag isa ka carbine kag mga bala.
Preso sanday Constantino, Gellanga kag Develes sa Jaro Police Station. (JoMaque)