Driver sang Melvin Taxi, ginhold-up sang 2 ka menor-de-edad; Mga suspek, nadakpan
Iloilo City — Ginhold-up sang duha ka menor-de-edad ang driver sang Melvin Taxi sa Westwood Subdivision sa Mandurriao kahapon, Setyembre 17.
Suno kay Pepito Tamon, nagsakay ang duha sa Megaworld area kag nagpadul-ong sa nasambit nga subdivision.
Ginpalibot-libot siya suno sa iya sa subdivision kag pag-abot sa bakante nga lote, nagdeklarar ang mga suspetsado sang hold-up.
Kada menor-de-edad ang may dala nga kutsilyo kag gintaya sa iya. Napilasan pa sa wala nga kamot ang driver sang ginwakli sini ang suspek nga nagtaya sa iya sang kutsilyo.
Apang subong nga gab-i nadakpan man ang duha nga nagasakay sa tricycle sa guwa sang subdivision.
P1,500 ang nakuha sa driver apang masobra P500 na lang ang nabalik sa iya.
Naga-edad sang 14-anyos ang duha ka mga suspetsado nga lunsay residente sang Bakhaw, Mandurriao. (JoMaque)