Nagpalapta sa sex scandal sang 2 ka pamatan-on sa patyo sa Dueñas, gina-imbestigaran sang police; mga residente, nagapati nga madugay na ini nga ginahimo sa patyo

Iloilo – Gina-imbestigaran na sang police kon sin-o ang nagpalapta sa sex video sang duha ka pamatan-on nga natabu sa patyo nga naglapta sa social media.

Nakuhaan ang video sa ibabaw sang pantiyon. Suno sa police, gina-validate pa nila ang report kag ginahibalo kon sin-o ang nag-upload sang video sa social media.

Ginpadulongan sang Aksyon Radyo News Team ang area kag nakita nga hulungdon ang pagsulod sa patyo. Gin-aku sang mga residente malapit sa patyo nga hayag sa ila barangay nga may naga-kahinabo nga kamala-malahan sa lugar apang wala man napamatud-an tubtob nga naglapta ang video.

Ginpasibangdan ang barangay tanod nga nagkuha sa video apang iya ini nga ginpanginwala.

Wala pa sang may nadihon nga tikang ang mga barangay officials agud matapna ang pag-himo sang kabastusan sa patyo. Apang nagahingyo ang mga residente nga bantayan sang maayo ang patyo agud indi na makasulod ang mga luyag maghimo sang kabastusan. (JoMaque)