LEGAL DIVISION SANG DPWH 6, TIKOM ANG BIBIG SA SISTEMA NGA ILA GINA-IMPLEMENTAR SA DELAYED NGA MGA KONTRATA

Iloilo City — Nagpamalibad nga magpa-interview ang Officer-In-Charge sang Legal Division sang Department of Public Works and Highways 6 angut sa delayed road projects sa idalum sang ila opisina.

Suno kay Atty. Mary Grace Bulaquina, mangayo siya anay sang ‘clearance’ kay DPWH 6 Director Wenceslao Leano Jr. natuhoy diri. Ginpangayuan paathag sang Aksyon Radyo Iloilo ang Legal Division bangud sang pagsalangisag sa gina-implementar nila nga sistema.

Ginkadtuan sang Aksyon Radyo Iloilo si Director Leaño sa iya opisina agud makuhaan sang pahayag apang nagpa-Boracay siya suno sa iya personnel para sa meeting nila ni DPWH 6 Secretary Mark Villar. Ginpadal-an man sang mensahe ang opisyal paagi sa text message apang wala siya nakasabat.

Base sa Annex I sang Implementing Rules and Regulations sang Government Procurement Reform Act, ‘verified position paper’ ang dapat nga isumiter sang kontraktor sa sulod sang pito ka adlaw sugod sang nabaton niya ang Notice of Termination halin sa Head sang Procuring Entity. Nasaad sa ‘verified position paper’ ang depensa sang kontraktor para indi pag-iterminate ang ila kontrata.

INDI VERIFIED PERO GINPROSESO

Ginbaton kag ginproseso sang DPWH Iloilo City District Engineering Office ang sulat sang ALJ Constructuon and Supply, Audric Construction and Supply kag HF Enterprises matapos sila ginpadal-an sang Notice of Termination sang Agosto 31.

Indi verified position paper ang ginsumiter nga dokumento sa ICDEO sang nasambit nga mga kontraktor baliskad sa nasaad sa Government Procurement Reform Act.

Setyembre 10 sang nabaton sang ICDEO ang sulat sang nasambit nga mga kontraktor. Magluwas sa paghingyo nga indi pag-iterminate ang ila kontrata, naghingyo man sila nga hatagan sang dugang nga tyempo tubtob makumpleto ang proyekto.

GINPASA

Ginsumiter naman sang ICDEO kay Director Leaño ang sulat sang mga kontraktor. Suno kay Engr. Rodney Gustilo, nasaad sa ila Department Order 55 series of 2011 nga pagrekomendar lang ang iya jurisdiction. Si Director Leaño suno kay Engr. Gustilo ang may otoridad sa pagterminate sang kontrata.

Sa pihak nga bahin, nasaad naman sa Annex I sang IRR sang Government Procurement Reform Act nga dapat desisyunan sang Head sang Procuring Entity ang pagterminate sang kontrata sa sulod sang non-extendible period of 10 (calendar) days sugod sang nabaton nila ang ‘verified position paper’ sang kontraktor.

Base sa kontrata sang ALJ Construction and Division, Audric Construction and Division kag HF Enterprises kag ICDEO, si Engr. Gustilo ang Procuring Entity.

NATAPOS NA

Natapos na ang gintalana nga tyempo para desisyunan ni Engr. Gustilo ang termination sa kontrata sang nasambit nga mga kontraktor.

Setyembre 10 sang nabaton sang ICDEO ang sulat sang mga kontractor apang wala sa gihapon ini nadesisyunan tubtob subong (Setyembre 21).

Suno kay Engr. Jona Paloma, head sang Construction Division sang ICDEO, isumiter nila kay Director Leaño ang Action Plan sang mga kontraktor agud mangin basehan sang opisyal sa pag-apruba ang ginhinyo sang mga kontraktor nga indi pag-terminate sa ila kontrata kag paghatag sang dugang nga tyempo para makumpleto ini.

Setyembre 13 sang nagpadala sang memorandum natuhoy diri si Leaño kay city Engr. Gustilo.

DELAYED

Sang Hulyo 12 pa nag-expire ang kontrata sang H.F. Enterprises sa Brgy. Veterans Village, City Proper nga nagabalor Php 3,829,845.03. Base sa report sang ICDEO sadtong Agosto 6, naglab-ot sa 84.88% ang negative slippage sang kontraktor. Wala sang equipment sa lugar suno sa ICDEO rason delayed ang pag-obra.

Kulang naman ang mga trabahador kag materyales sang ALJ Construction and Supply sa ila road project sa Brgy. Balantang, Jaro. Nagtakop ang ila kontrata nga nagabalor sang Php 12,209,413.65 sang Setyembre 4. Sang Agosto 6, naglab-ot sa 26.55 ang ila negative slippage.

Kulang man ang mga equipment sang Audric Construction sa ila proyekto sa Brgy. Zamora, City Proper nga nagabalor sang Php 18, 431,500.88. Suno sa ICDEO, indi man manami ang ila site management. Suno kay Engr. Paloma, nagtakop sang Setyembre 20 ang revised expiry date sang kontrata sang amo nga kontraktor. Sang Agosto 6, 29.12% ang ila nga nagative slippage.

Padayon ang pag-obra sang HF Enterprises kag Audric Construction and Supply suno kay Engr. Paloma rason nagnubo ang ila negative slippage sa subong(Setyembre 21).

MAY SAMPLE NA

Nangin kontrobersiyal sang damlag lang ang road project sa San Juan Street, Brgy. San Antonio, Molo. Sang Hunyo 19 pa nag-expire ang amo nga kontrata sang Legacy Construction nga nagabalor sang Php 21,182,958.61.

Una na ginreport nga indi verified ang position paper nga ginsumiter sang Legacy Construction sa ICDEO. Sa pihak sini, gin-aprubahan nanday Engr. Gustilo kag Director Leaño ang ginhingyo sang kontraktor nga indi pag-iterminate sang ila kontrata kag paghatag sang 45 diyas para makumpleto ang proyekto.

Base sa Memorandum nanday Engr. Gustilo kay Director Leaño sang Hulyo 5, nanindugan sila nga iterminate ang kontrata sang Legacy Construction kun mapaslawan nga matapos ang proyekto sa ginpasalig nga 45 diyas. Dugang diri, irekomenda man nila ang pagblacklist sa amo nga kontraktor apang wala ini na-implementar.

94 diyas subong nga adlaw (Setyembre 21) sugod sang nag-expire ang kontrata sang Legacy Construction, wala sa gihapon nakumpleto ang proyekto. (JoMaque)