Dumangas, Iloilo–Patay ang driver sang Toyota Revo matapos nakabunggo sa Ceres bus sa Barangay Balabag, Dumangas kaina sang aga, Setyembre 25.

Suno kay SPO3 Roger Parcon sang Dumangas Police Station, gindeklarar ni Dr. Timothy John Biñas sang Don Jose Monfort Medical Center sa Barotac Nuevo nga dead-on-arrival si Remegio Inventor sang Bulaqueña, Estancia alas-12:35 sang hapon.

Pasado alas-10 natabu ang aksidente apang duha ka oras pa nga naipit sa iya salakyan si Inventor antes nakuha bangud sa impact sang pagbunggo sang iya salakyan sa bus. Nagbuligay ang Dumangas Fire Station personnel, Dumangas police, Dumangas MDRRMO, ILECO 2 personnel kag Passi City Fire personnel agud makuha si Inventor.

Upod sang napatay ang iya asawa nga si Certy nga padayon nga ginabulong sa Barotac Nuevo District Hospital.

Ginpahayag nga may narecover nga cellphone sa Revo kag may text message nga wala na-send nga nagapahibalo nga nagalain ang pamatyag sang driver.

Base sa kuha sang dash cam sang Ceres bus, sugat-anay ang duha ka salakyan apang gin-agaw sang Revo ang lane sang bus.

Suno sa bus driver nga si Ramil Bansales sang Barotac Viejo, naka-full stop na siya sang nakita nga nagahagunos ang Revo pero wala gid nagdulog ang driver. (AGB)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply