Iloilo City–Ginplastar ni Councilor Plaridel Nava ang apat ka mga puntos kun ngaa wala siya nagpabor sa resolution nga nagahatag sang otoridad kay Mayor Joe Espinosa nga magpirma sa memorandum of agreement agud pasugtan nga makahaboy sang basura ang Leganes sa Calajunan dumpsite sa Mandurriao.

Una suno sa konsehal, indi pa compliant sa Republic Act 9003 ukon Ecological Solid Waste Management Act of 2001 ang syudad bangud open dumpsite ang Calajunan; ikaduha, ginmatu-matuhan suno sa iya ni Councilor R. Leone Gerochi ang paghimo sang MOA nga dapat kuntani gin-obra sang LGU sang Leganes.

Ikatatlo, magaserbi suno sa iya nga precedence ang MOA bangud posible nga mag-ayo man ang iban nga banwa nga miembro sang Metro Iloilo-Guimaras Economic and Development Council ukon MIGEDC. Ginakahangaw-an ni nava nga mangin dumping site ang syudad kon ang mga banwa nga miembro sang MIGEDC ang maghingyo man nga mahaboy sang basura sa Calajunan.

Ang ikaapat nga rason ni Nava amu nga wala naghimo sang public consultation ang Committee on Environment ni Gerochi antes ginpasar ang resolution.

Nagpadala sang sulat suno sa iya ang munisipyo sang Leganes sa City Government kag ginrefer ini sang alkalde sa konseho nga nagtupa naman sa komitiba ni Gerochi.

Gin-aprubahan ang resolution nga ginpamatukan ni Nava kag nag-abstain naman si Councilor Joshua Alim. (AGB)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply