Iloilo City–Naka-agenda na sa session sang city council sa masunod nga semana ang i-proponer ni Councilor R Leone Gerochi nga resolution nga maga-engganyo sa city government nga magpasilabot sa deliberasyon sa kongreso angut sa paghatag sang franchise sa electricity distribution sa syudad.

Suno kay Gerochi, chairman sang Committee on Public Utilities sang city council, may bag-o nga player nga nag-capitalized sa mga pagtinguha, lakip na sang Aksyon Radyo Iloilo, agud nga mapabakod ang ila application para sa franchise sa power distribution sa siyudad ilabe na nga damo ang disgustado sa Panay Electric Company nga amo subong ang nagaisahanon nga power distributor sa Iloilo City.

Ginpahayag sang konsehal nga sa pag-deliberate sang application for franchise sang bag-o nga player, daw kasubong nga wala nakahibalo ang taga-siyudad–kun ano nga korporasyon, kun ano ang ila kapasidad kag kun ano ang ila tuyo sa siyudad. Bilang chairman sang komitiba, ginpahayag ni Gerochi nga wala gid siya napadal-an sang notice para makapasakop man lang kuntani sa deliberasyon.

Ang masubo pa kay ang naga-diskusyon sa kongreso, indi man taga-Iloilo City kabangdanan kun sala ang mangin desisyon sa palaabuton, mga pumuluyo sang siyudad sang Iloilo man ang maga-antus.

Pananglitan mapasar ang resolution, automatic suno kay Gerochi nga magapili sila kun sin-o ang magarepresentar sa siyudad.

Handa naman nga magsuporta si Councilor Joshua Alim sa resolusyon nga iduso ni Councilor Gerochi. Apang suno kay Alim, dapat madugay na ini nga ginpasar kag indi subong lang kon diin may posibilidad na nga ma-isyuhan ang Monte Oro Resources and Energy sang prangkisa nga mag-operate.

“Hand’s off”

Indi magpasilabot si Mayor Joe Espinosa sa application for franchise sang MORE bilang power distributor.

Suno sa alkalde, hands-off siya sa paghatag sang komento kag hulaton na lang ang desisyon sang Kongreso bangud nagapadayon pa ang deliberasyon sa application. (AGB)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply