Special Operation Task Group, gintukod sang Police Regional Office 6 agud magtutok sa imbestigasyon sa pagpatay kay Atty. Edeljulio Romero

Camp Delgado–Ginpaboran ni Police Regional Office (PRO) 6 Director PCSUPT John Bulalacao ang pagtukod sang special investigation task group (SITG) agud matutukan ang imbestigasyon sa pagtiro patay kay Atty. Edeljulio Romero sa Roxas City, Capiz sang Setyembre 28 sang hapon.

Suno kay Bulalacao, gintukod ang SITF bangud miyembro sang Integrated Bar of the Philippines ukon IBP si Romero.

Ginpahayag ni Bulalacao nga wala man sang nagadumili sa police sa pagtukod sang SITG kag pag-imbestigar bisan pa high value target drug personality level 3 si Romero sa ila watchlist.

Madumduman gintiro-patay si Romero samtang nagakaun sa guwa sang port kag nagahulat sang barko nga sakyan pabalik sa Manila. May isa ini ka igo sa ulo.

Wala gihapon nakilala ang tatlo ka suspek nga sakay sa SUV base sa CCTV footage. (AGB)