Iloilo City–Ginbulabog sang bomb threat ang Ateneo de Iloilo sa Mandurriao.

Pasado alas-9 sang aga, Oktubre 2, sang naguwa ang impormasyon nga may ginpasuni nga bomba sa compound sang eskwelahan. Amat-amat nga ginpapuli ang mga estudyante matapos nga nagtawag ang school authorities sang police.

Mga alas-12:52 sang hapon, may nabatian nga lupok nga ginconfirmar sang ulihi ni PInsp Reman Benobo, deputy team leader sang Explosive and Ordnance Division (EOD) K-9 unit sang Police Regional Office 6, nga water disruptor nga ila gingamit agud maguba ang suludlan sang ginapatihan nga explosive.

Natukiban nga hoax bomb ukon indi matuod nga bomba ang unod sang package kundi bottled water nga may wiring nga naangut sa cellphone.

Ginpasiguro naman ni Father Joseph Haw, presidente sang Ateneo de Iloilo, nga maga-coordinate sila sa mga otoridad para sa mas madalum nga imbestigasyon agud makilala kon sin-o ang may kahimuan sang hoax bomb kag mapasakaan sang kaso. Suno pa kay Haw, hugtan pa nila ang seguridad para sa safety sang mga naga-eskwela kag nagasulod sa buluthuan. (AGB/FE/ATT/KJT)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply