Ginsaysay ni Supt. Jonathan Pablito, hepe sang Police Station 1, kon paano nila na-trace ang suspek sa bomb threat sa University of San Agustin.

Sa pag-imbestigar suno kay Pablito, natukiban nga may tatlo ka Facebook accounts nga gingamit si alyas Vic, 28, nga ginlaragway nga person with special needs, sang nagchat sa mga eskwelahan nga ginpadal-an sini sang pamahug.

Na-deactivate na ang account nga Felix Tan nga nagpadala sang una nga pamahug sa USA sang Oktubre 3 sang hyapon.

Ang account nga Andalmalek al-Ahdal ang nagpadala sang ikaduha nga mensahe sa USA kahapon sang aga samtang ang isa pa ka account ang nagpadala naman sang pamahug sa isa pa ka eskwelahan.

Nakig-angut sa police ang wala ginhingadlan ni Pablito nga eskwelahan kag nakita nga may litrato sa FB account nga nagpadala sang bomb threat nga nagasantu sa mga pictures sa account nga Andalmalek al-Ahdal.

Gincheck sang mga imbestigador ang common friends sang duha ka FB accounts tubtob nakita ang account ni Vic.

Natultulan si Vic sang nakita sa iya post nga matambung siya sang prayer meeting sang isa ka religious organization sa Molo kahapon.

Sa bulig sang nagkalain-lain nga police units kag community, nakita si Vic nga gin-imbitar sa Police Station sa diin sini gin-ako ang pagpadala sang bomb threat sa University of San Agustin kahapon kag sa isa pa ka eskwelahan apang ginpanginwala nga siya ang namahug sa Ateneo de Iloilo.

Gina-usisa na ang laptop ni Vic nga ginhambal sini iya ginhimuan sang mga FB accounts.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply